عايز تعمل موقع تعليمي أو منصة تعليمية باسمك؟ ده اللي محتاجه

تعمل موقعك التعليمي إزاي، خطوة بخطوة

1. 1

   اختار اسم موقعك

   بتسجّل باسمك واسم منصتك، ورابط موقعك بيتعمل من الاسم. اختاره كويس، لأنك لو غيّرته بعدين الرابط القديم بيبطّل يشتغل.

2. 2

   اختار باقتك أو ابدأ التجربة

   بتختار الباقة اللي تكفي طلابك. التجربة المجانية بتبدأ لما تدوس على زرارها في خطوة الدفع، مش وقت التسجيل، فخد وقتك.

3. 3

   اختار شكل موقعك

   بتختار من 30 تصميم جاهز، أول تصميمين منهم ببلاش. بعد كده بتدوس على أي جزء في الصفحة وتغيّر كلامه وألوانه وخطه وصوره، وتحط شعارك.

4. 4

   اكتب محتوى الصفحة العامة

   بتكتب نبذة عنك، وآراء طلابك، وعناوين فروعك لو عندك سنتر، والأسئلة الشائعة. واللي تسيبه فاضي مش بيظهر.

5. 5

   ضيف أول كورس أو مجموعة

   بتعمل المرحلة الدراسية، وجواها كورس مقسم لوحدات ودروس أو مجموعة أونلاين بمواعيدها، وتحط السعر. كل درس يا إما فيديو بترفعه يا إما رابط يوتيوب.

6. 6

   انشر الرابط لطلابك

   بتبعت رابط موقعك على صفحاتك وجروباتك. الطالب بيسجّل ويدفع أونلاين أو بكود، والكورس بيتفتح له لوحده.

موقع تعليمي ولا منصة تعليمية؟ إيه الفرق؟

ناس كتير بتقول «موقع» وتقصد صفحة تعرّف بالمدرس، وتقول «منصة» وتقصد المكان اللي الطالب بيتفرج فيه على الدروس ويحل الامتحانات. الاتنين حاجتين مختلفتين، وأغلب المدرسين محتاجين الاتنين.

على سناتر بتاخد الاتنين مع بعض على نفس الموقع: الصفحة العامة اللي أي حد بيشوفها، فيها اسمك وشعارك وكورساتك وآراء طلابك، والمنصة اللي الطالب بيدخلها بحسابه يتفرج ويحل ويدفع.

محتاج إيه عشان تعمل موقع تعليمي؟

أربع حاجات، ولو واحدة منهم ناقصة الموقع مش هيشتغل كمصدر دخل.

• اسم: اسم الطالب يفتكره، وموقع بيه على الإنترنت. على سناتر رابط موقعك بيتعمل من اسم منصتك، وفي باقة «الاحترافية» تقدر تطلب دومين خاص بعد الاشتراك المدفوع، وفريقنا بيشتريه ويربطه.
• محتوى: كورسات مسجلة، أو مجموعات أونلاين، أو الاتنين. ده الجزء اللي بياخد وقت، ومحدش يقدر يعمله غيرك.
• طريقة الطالب يدفع بيها: على سناتر الطالب بيدفع بالجنيه عن طريق فواتيرك، بطرق زي الكارت وأكواد فوري وأمان والمحافظ زي فودافون كاش، أو بكارت شحن اشتراه كاش.
• حماية: الفيديو المرفوع متشفّر ضد أدوات التحميل، وعليه علامة مائية باسم الطالب، والطالب بيدخل من جهاز واحد في نفس الوقت.

قدامك كام طريقة؟ مبرمج، ووردبريس، ولا منصة جاهزة

تلات طرق مشهورة، وكل واحدة ليها مكان. الجدول ده مختصر، والتفاصيل في دليل «مبرمج ولا منصة جاهزة».

• مبرمج ولا منصة جاهزة؟
• فيه طريقة مجانية؟
• الدليل الكامل: إزاي تعمل منصة تعليمية

موقع تعليمي بيتكلف كام؟

على سناتر الاشتراك شهري، ومفيش تكلفة إعداد ولا استضافة ولا دومين تشتريه. الباقات دلوقتي: «البداية» بـ 999 جنيه في الشهر لحد 100 طالب، و«الأساسية» بـ 1,999 جنيه في الشهر لحد 200 طالب، و«الاحترافية» بـ 2,999 جنيه في الشهر لحد 400 طالب.

الباقات بتفرق في عدد الطلاب والمساحة وسعر الطالب الإضافي. لو طلابك زادوا، الطالب الجديد بيتسجّل عادي، والزيادة بتتحسب مرة واحدة لكل طالب لما يتضاف بالسعر المكتوب على باقتك، مش كل شهر.

الدومين الخاص في باقة «الاحترافية» بس، وأول سنة منه مجانية مع الباقة. وسعرك بيوصلك كامل من الطالب، ولو فيه عمولة على الدفع أونلاين بتتضاف على الطالب فوق سعرك.

• الأسعار
• تكلفة عمل منصة تعليمية في مصر

هياخد وقت قد إيه؟

التسجيل وتجهيز الموقع بياخدوا دقايق. اللي بياخد وقت هو محتواك: تصوير الدروس وترتيبها وكتابة الامتحانات، وده على حسب انت جاهز قد إيه.

لو عندك فيديوهات جاهزة، رفعها بيمشي في الخلفية: مفيش حد لحجم الملف، والفيديو الواحد لحد 6 ساعات بجودة 720p وحوالي 3 ساعات بجودة 1080p، والرفع بيكمّل من مكانه لو النت قطع، وبتشوف شريط التقدم وانت شغال في باقي لوحة التحكم. والفيديوهات الجديدة بتتضغط بعد الرفع عشان تاخد مساحة أقل من مساحتك، من غير فرق في الجودة تقدر تشوفه.

ولو عايز تبدأ قبل ما المحتوى يكمل، تقدر تنشر الكورس الأول وتسيب الباقي مسودة لحد ما يجهز.

الموقع هيبقى باسمي فعلًا؟

أيوه. الطالب بيشوف اسمك وشعارك وألوانك، مش اسم منصة تانية فوق اسمك.

• موقع باسمك، ودومين خاص في باقة «الاحترافية»، والرابط القديم بيحوّل عليه.
• 30 تصميم جاهز لمواد ومراحل مختلفة، وتعديل أي جزء بالضغط عليه.
• الموقع عربي، أو إنجليزي، أو الاتنين بزرار لتغيير اللغة، والعملة جنيه أو دولار أو ريال سعودي.
• زرار واتساب مجاني على موقعك من متجر الأدوات.

• شوف التصميمات
• منصة باسمك للمدرس الخصوصي

موقعي هيظهر في جوجل؟

سناتر بتديك الأدوات، والظهور نفسه بيعتمد على محتواك ومنافسينك. بتكتب عنوان موقعك ووصفه وكلمات البحث بالعربي والإنجليزي، وتحط أيقونة الموقع، وكل موقع مدرس ليه خريطة صفحات خاصة بيه عشان محركات البحث تلاقي صفحاته.

محدش يقدر يضمنلك مكان في أول نتيجة. اللي بيفرق فعلًا: اسم واضح، وصفحات كورسات مكتوبة كويس، وطلبة بيدوروا عليك باسمك.

بعد ما الموقع يشتغل، الطالب بيعمل إيه؟

الطالب بيدخل على رابطك، ويسجّل برقم موبايله أو إيميله، في استمارة انت اللي بتختار خاناتها.

• بيشتري الكورس أو المجموعة أونلاين، أو بيكتب كود كارت الشحن، والمحتوى بيتفتح له لوحده.
• في حسابه بيلاقي كورساته ومجموعاته وامتحاناته ومدفوعاته وإشعاراته، وصفحة يبعتلك منها رسالة دعم.
• لو نسي كلمة السر بيغيّرها بكود من 6 أرقام بيوصله على الإيميل أو الواتساب.
• وانت بتشوف كل طالب: اتفرج على إيه، ودرجاته، ودفع إيه.